ನಮಗೇಕೆ

ನಿನ್ನೊಡನೆ ನಡೆವಾಗ ದೂರ ತೀರದ ಯೋಚನೆ ನನಗೇಕೆ
ನೀನು ನನ್ನಲ್ಲಿ ನುಡಿವಾಗ ಅನ್ಯರ ಆಲೋಚನೆ ನನಗೇಕೆ
ನಾನು ನಿನಗಾಗಿ ಇರುವಾಗ ಕಷ್ಟದ ಅರಿವು ನಿನಗೇಕೆ
ನನ್ನ ಪ್ರೀತಿಯು ಇರುವಾಗ ಲೋಕದ ಭಯವು ನಿನಗೇಕೆ
ಬೆರೆಯವರ ಬೇಡದ ಗಮನ ನಮಗೇಕೆ,
ನನಗೆ ನೀನು ನಿನಗೆ ನಾನಿರುವಾಗ...

ಗೆದ್ದ ಯೋಧ

ಬೀಸುವ ಹಿಮಗಾಳಿ ತಂದಿರಲು ಮರಗಟ್ಟಿಸುವ ಚಳಿ
ಬರಲು ಇಚ್ಛಿಸಿದ ಜವರಾಯ ನಿಮ್ಮ ಬಳಿ

ಶತ್ರುಗಳ ಹುಟ್ಟುಗಿಸುವ ನಿಮ್ಮಲ್ಲಿತ್ತು ಬದುಕನು ಜಯಿಸುವ ಕೆಚ್ಚು
ನಿಮ್ಮ ಸಾಹಸ ಕಂಡ ವಿಧಿಗೂ ಆಗಿರಬೇಕು ಹೊಟ್ಟೆ ಕಿಚ್ಚು

ನಿಮ್ಮ ಅಗಲಿಕೆಗೆ ಮರುಗಿವೆ ಹೃದಯಗಳು ನಮ್ಮೆಲ್ಲರ
ನಮಗೆಲ್ಲರಿಗೂ ಸ್ಪೂರ್ತಿಯ ಸೆಲೆಯಾದ ನೀವು ಅಜರಾಮರ

೨೦೧೬ನೆ ಇಸವಿ

ಈ ಹೊಸ ವರ್ಷದಲ್ಲಿ...

ಯಶ ಸಂಪತ್ತುಗಳ ಮೀರಿದ್ದಾಗಲಿ ನಿಮ್ಮ ನೆಮ್ಮದಿ,
ಆಗಲಿ ನಿಮ್ಮ ಮನೆ-ಮನಸ್ಸು ಸುಖ-ಸಂತಸಗಳ ಸನ್ನಿಧಿ,
ನಿಮ್ಮ ಬಾಳಾಗಲಿ ನೆನಪಿನಲ್ಲಿಡುವಂತಹ ಸುಂದರ ತ್ರಿಪದಿ.

೨೦೧೬ನೆ ಇಸವಿಯ ಹಾರ್ದಿಕ ಶುಭಾಶಯಗಳು

ತತ್ವ

ಜಗತ್ತೇ ಹೀಗೆ, ಕಣ್ಣ ಮುಂದಿರುವವರೆಗು ನಿನ್ನ ಅಸ್ತಿತ್ವ
ಮರೆಯಾದರೆ ನಿನಗೆ ತಿಳುವುದು ಬದುಕಿನ ತತ್ವ

ನೆಮ್ಮದಿಯುಂಟು ಮರೆತುಬಿಡೆ ನಿನ್ನದಲ್ಲದ ಜಗತ್ತನ್ನು
ಜಯವುಂಟು, ಅರಿತು ಮುನ್ನಡೆ ನಿಲ್ಲದೆ ಯಾರಿಗೂ ನೀನಿನ್ನು.

ಹೊಸತನ

ನೂರಾರು ಆಲೋಚನೆಗಳಿದ್ದರೂ ಅದೇಕೊ
ನಿನ್ನ ನೋಡುವ ಬಯಕೆಗೆ ಕಾಡಿದೆ ಓಂಟಿತನ||

ಒಂಟಿತನದ ತಪ್ಪಿಲ್ಲದಿದ್ದರೂ ಇಂದೇಕೊ
ಪ್ರೀತಿಗೆ ಸೋತ ಮನಸು ಕಳೆದುಕೊಂಡಿದೆ ತನ್ನತನ||

ಇದೆಲ್ಲದರ ಅರಿವಿದ್ದರೂ ನನಲ್ಲೇಕೋ
ಮೂಡಿದ ಕನಸುಗಳು ತಂದಿವೆ ನನ್ನಲ್ಲಿ ಮತ್ತೆ ಹೊಸತನ||

ತಾಯಿಯ ನಮಿಸು

ನೀ...

ಸುಂದರ ಪ್ರಕೃತಿ ನೀಡಿದ ಕನ್ನಡಾಂಬೆಯ ನಮಿಸು
ಕನ್ನಡ ತಾಯಿಯ ಮಕ್ಕಳ ತ್ಯಾಗವ ಸದಾ ಸ್ಮರಿಸು
ಎಲ್ಲಿದ್ದರೇನು ಕನ್ನಡವ ಮರೆಯದೆ ನಿತ್ಯ ಪಠಿಸು
ಸಿರಿಗನ್ನಡಂ ಗೆಲ್ಗೆ ಸಿರಿಗನ್ನಡಂ ಬಾಳ್ಗೆ ಎಂದು ಭಜಿಸು

ಸಮಸ್ತ ಕನ್ನಡ ಕುಲಕೋಟಿಗೆ ಕರ್ನಾಟಕ ರಾಜ್ಯೋತ್ಸವದ ಹಾರ್ದಿಕ ಶುಭಾಶಯಗಳು

ಚಿತ್ರಣ

ಬದುಕಾಗದಿರಲಿ ರಂಗು-ರಂಗಿನ ಮಳೆಬಿಲ್ಲಿನಂತೆ,
ಹತ್ತಿರ ಹೋದರೂ ಎಟುಕದು ಅದು ಕೈಗೆ.
ಬದುಕಾಗಲಿ ಬಿಳಿ ಹಾಳೆಗಳು ತುಂಬಿದ ಪುಸ್ತಕದಂತೆ,
ಮೂಡಲಿ ಅದರಲಿ ಚಿತ್ರಣ ನಾವು ಗೀಚಿದ ಹಾಗೆ.