ದೀವಿಗೆ

ಕರಗಿದೆನು ನಿನ್ನ ಮೊದಲ ಅಳುವಿಗೆ
ಸೋತೆನು ನಿನ್ನ ತೊದಲ ನಗುವಿಗೆ
ತಂದಿರುವೆ ಸಂತಸವ ನೀ ನಮ್ಮ ಬದುಕಿಗೆ
ಬಂದಿರುವೆ ಬೆಳಕಾಗಿ, ಕತ್ತಲ ಬಾಳಿಗೆ ನೀನೆ ದೀವಿಗೆ

ನನಸಾಗಲಿ

ಬಲಿಯುತಲಿವೆ ರೆಕ್ಕೆಗಳು, ಕಂಡ ಸವಿಗನಸು ಹಾರುವುದೊಂದೆ ಬಾಕಿ||
ಮೂಡುತಿವೆ  ಭಾವಗಳು, ನನಸಾಗಲಿ ಅವು ಜಡವ ಬದಿಗೆ ನೂಕಿ||

ಬಾಳು ಹಸಿರು

ಉಸಿರಾಡುವ ಮುನ್ನ ನೀನಾರು?
ಹುಟ್ಟಿದ ನಂತರವೇ ನೀ ಪಡೆಯುವೆ ಮೊದಲ ಹೆಸರು||
ಉಸಿರು ನಿಂತಾಕ್ಷಣ ನಿನಗಾರು?
ಸಾವಿನಲ್ಲಿ ಕಾಣುವೆ ಮುಕ್ತಿ ಕೊಡುವ ಕೊನೆಯ ನಿಟ್ಟುಸಿರು||

ಉಸಿರಾಡುವಾಗ ಕೆಟ್ಟ ದಾರಿ ಹಿಡಿದರೆ ಬಾಳು ಕೆಸರು,
ಬದುಕಿರುವಾಗ ಒಳಿತನ್ನು ಬಯಸಿದರೆ ಬಾಳು ಹಸಿರು!!!

ಕೋರುವೆ

ನೀನೊಮ್ಮೆ ಮುಗುಳ್ನಕ್ಕರೆ ಕನಸಲೂ ನಿನ್ನನೇ ಕೋರುವೆ
ಎರಡು ಮಾತನಾಡಿದರೆ ಆ ಕ್ಷಣವೇ ನಾ ಸೋಲುವೆ
ಸೋತ ಈ ಹೃದಯ ನಿನಗೆ ಮೀಸಲು ಓ ಚೆಲುವೆ
ಎದೆಬಡಿತಕೆ, ಅದರ ಮಿಡಿತಕೆ ಕಾರಣ ನೀನೆ ಅಲ್ಲವೆ?

ಯುಗಾದಿ ೨೦೧೬

ತಂಪನು ತರಲಿ ಮಾವಿನ ತಳಿರು ತೋರಣ,
ಆನಂದವ ತುಂಬಲಿ ಹೋಳಿಗೆಯ ಹೂರಣ,
ಆರೋಗ್ಯ ಭಾಗ್ಯವ ನೀಡಿದರೆ ಬೇವಿನ ಕಹಿ,
ಸದಾ ಸಂತಸವನ್ನು ನೀಡಲಿ ಬೆಲ್ಲದ ಸಿಹಿ.
ಹೊಸ ವರ್ಷವಾಗಲಿ ನಿಮ್ಮ ಏಳಿಗೆಯ ತಳಹದಿ,
ನಿಮ್ಮಲ್ಲಿ ಸುಖ-ಶಾಂತಿಗಳ ಹರಿಸಲಿ ಈ ಯುಗಾದಿ

ಯುಗಾದಿ ಹಬ್ಬದ ಹಾರ್ದಿಕ ಶುಭಾಶಯಗಳು

ನಮಗೇಕೆ

ನಿನ್ನೊಡನೆ ನಡೆವಾಗ ದೂರ ತೀರದ ಯೋಚನೆ ನನಗೇಕೆ
ನೀನು ನನ್ನಲ್ಲಿ ನುಡಿವಾಗ ಅನ್ಯರ ಆಲೋಚನೆ ನನಗೇಕೆ
ನಾನು ನಿನಗಾಗಿ ಇರುವಾಗ ಕಷ್ಟದ ಅರಿವು ನಿನಗೇಕೆ
ನನ್ನ ಪ್ರೀತಿಯು ಇರುವಾಗ ಲೋಕದ ಭಯವು ನಿನಗೇಕೆ
ಬೆರೆಯವರ ಬೇಡದ ಗಮನ ನಮಗೇಕೆ,
ನನಗೆ ನೀನು ನಿನಗೆ ನಾನಿರುವಾಗ...

ಗೆದ್ದ ಯೋಧ

ಬೀಸುವ ಹಿಮಗಾಳಿ ತಂದಿರಲು ಮರಗಟ್ಟಿಸುವ ಚಳಿ
ಬರಲು ಇಚ್ಛಿಸಿದ ಜವರಾಯ ನಿಮ್ಮ ಬಳಿ

ಶತ್ರುಗಳ ಹುಟ್ಟುಗಿಸುವ ನಿಮ್ಮಲ್ಲಿತ್ತು ಬದುಕನು ಜಯಿಸುವ ಕೆಚ್ಚು
ನಿಮ್ಮ ಸಾಹಸ ಕಂಡ ವಿಧಿಗೂ ಆಗಿರಬೇಕು ಹೊಟ್ಟೆ ಕಿಚ್ಚು

ನಿಮ್ಮ ಅಗಲಿಕೆಗೆ ಮರುಗಿವೆ ಹೃದಯಗಳು ನಮ್ಮೆಲ್ಲರ
ನಮಗೆಲ್ಲರಿಗೂ ಸ್ಪೂರ್ತಿಯ ಸೆಲೆಯಾದ ನೀವು ಅಜರಾಮರ