ಯುಗಾದಿ ೨೦೧೯

ಹಚ್ಚ ಹಸುರಿನ ಚಿಗುರಿನ ನಡುವೆ ಹೆಚ್ಚಿದೆ ಪ್ರಕೃತಿಯ ಬೆಡಗು
ಮನೆಗಳಿಗೆ ರಂಗೋಲಿ, ತಳಿರು-ತೋರಣಗಳ ಮೆರುಗು||
ಒಳ್ಳೆ ಮಾತನಾಡುತ ಬೇವು ಬೆಲ್ಲವ ಸವಿಯೋಣ
ನಗುವ ಹಂಚುತ ಯುಗಾದಿ ಹಬ್ಬವ ಆಚರಿಸೋಣ||

ಯುಗಾದಿ ಹಬ್ಬದ ಹಾರ್ದಿಕ ಶುಭಾಶಯಗಳು

ಸಂಕ್ರಾಂತಿ - ೨೦೧೯

ನಗುವ ಮೊಗವ ತೋರಿ,
ಪ್ರೀತಿ ಸಂಕೇತವ ಸಾರಿ,
ಎಳ್ಳು-ಬೆಲ್ಲವ ಬೀರಿ,
ಆಚರಿಸುವ ಸಂಕ್ರಾಂತಿ ಈ ಬಾರಿ

ಸಂಕ್ರಾಂತಿ ಹಬ್ಬದ ಹಾರ್ದಿಕ ಶುಭಾಶಯಗಳು

ಕರಗುವೆನು

ಮಗಳೆ...

ನೀ ಮರುಗಿದಾಗ ಕೊರಗುವ ನಾನು,
ನೀ ನನ್ನೆದೆಗೆ ಒರಗಿದಾಗ ಕರಗುವೆನು!!!

ದೀಪಾವಳಿ ೨೦೧೮

ಇಲ್ಲವಾಗಲಿ ನಿಮ್ಮ ಬಾಳಿನ ಎಲ್ಲಾ ಕೊರತೆ,
ಅದಕ್ಕಾಗಿ ನೀವು ಹಚ್ಚಬೇಕಿದೆ ಸಹಬಾಳ್ವೆಯ ಹಣತೆ.

ಇಲ್ಲವಾಗಲಿ ನಿಮ್ಮ ಬಾಳಿನ ಎಲ್ಲಾ ಕಹಿ,
ಅದಕ್ಕಾಗಿ ನೀವು ಹಂಚಬೇಕಿದೆ ಪ್ರೀತಿಯ ಸಿಹಿ.

ಇಲ್ಲವಾಗಲಿ ಮನದ  ಕತ್ತಲೆಯ ಹಾವಳಿ,
ಅದಕ್ಕಾಗಿ ಆಚರಿಸಬೇಕಿದೆ ಬೆಳಕಿನ ದೀಪಾವಳಿ.

ದೀಪಾವಳಿ ಹಬ್ಬದ ಹಾರ್ದಿಕ ಶುಭಾಶಯಗಳು

ಸೇತುವೆ

ಮನಕೆ ಮುದ ನೀಡುವುದು ನಿನ್ನ ಮಧುರ ಮಾತಲ್ಲವೆ?
ಸವಿನುಡಿಗೆ ಮೂಡಿದೆ ಹೃದಯಗಳ ನಡುವೆ ಸೇತುವೆ||
ಸೇತುವೆ ಕಟ್ಟಿ ನನ್ನ ಬರಸೆಳೆದವಳು ನೀನಲ್ಲವೆ?
ನೀನೆಲ್ಲೇ ಇರು ನಾ ಬಂದು ನಿನ್ನನು ಸೇರುವೆ||

ಮೂರು-ಆರರ ಲೆಕ್ಕ

ಜಗವ ನೀ ಗೆದ್ದರೂ, ತಿಳಿದಿಕೊ ಕೊನೆಗೆ ನಿನ್ನದು ಮೂರು-ಆರರ ಲೆಕ್ಕ
ಜನರ ಮನಸ್ಸಿಗೆ ನೀ ಸೋತರೆ ಸುಖ-ದುಃಖದಲ್ಲಿ ಅವರೆಲ್ಲ ನಿನ್ನ ಪಕ್ಕ

ಪಿತೃ ಪಕ್ಷದ ಕಾಗೆ!

ಸಾವಿನ ಮನೆ-ಮನಗಳಂಗಳದಿ ಆರಿದ ಕಿಚ್ಚಿನಿಂದ ದುಃಖದ ಹೊಗೆ
ಅದೇ ಸಾವಿನ ಸುದ್ದಿ ಕೇಳಿ ಕೆಲವರೊಳಗೆ ಸಮಾಧಾನದ ನಗೆ
ಹಿಂದೊಮ್ಮೆ ಜರಿದವರ ಬಾಯಲ್ಲಿ ಪ್ರಶಂಸೆಗಳು ನೂರಾರು ಬಗೆ
ಬಳಲಿದ ಜೀವದ ಕಂಬನಿ ಒರೆಸದವರ ಕಣ್ಗಳಲಿ ಕಣ್ಣೀರ ಬುಗ್ಗೆ
ಬದುಕಲಿ ಹಸಿದಿದ್ದ ಜೀವ ಸತ್ತ ಮೇಲೆ ಪಿತೃ ಪಕ್ಷದ ಕಾಗೆ!