ಶನಿವಾರ, ಜನವರಿ 22, 2022

ಮೂರನೆ ತಾಯಿ!!!



 ಮಗುವೇ,

ಪ್ರೀತಿಯ ಸಂಪತ್ತು ಅರಸುತ್ತಲಿದ್ದ ನಮಗೆ ದೊರಕಿದ ನೀ ಒಂದು ಅಮೂಲ್ಯವಾದ ಮುತ್ತು

ನಗುವೇ ನಿನ್ನ ಹುಟ್ಟುಗುಣವಾಗಿರಲು ಅದ ಪಸರಿಸಿ ನಮಗೆ ಉಣಿಸಿರುವೆ ಬಾಂಧವ್ಯದ ತುತ್ತು,

ಒಂದು ಬಳ್ಳಿಯ ಎರಡನೆ ಕೂಸಾದರೂ ನಮ್ಮ ಮೂರನೆ ತಾಯಿ ನೀನು ನೀನೇ ನಮ್ಮ ಸ್ವತ್ತು!!!

ಶನಿವಾರ, ಅಕ್ಟೋಬರ್ 16, 2021

ಪರೀಕ್ಷೆ

ಮತ್ತದೆ ಮಳೆ, ಕಿಟಕಿಯಾಚೆ ಇಣುಕಲು, ಬರೀ ನಿನ್ನದೇ ನಿರೀಕ್ಷೆ

ಬರಲಿ ಮಿಂಚು, ಆ ಬೆಳಕಲಿ ಕಾಣು ನೀ, ನಿಲ್ಲಲಿ ಕಾಯುವ ಪರೀಕ್ಷೆ!!!


ಭಾನುವಾರ, ಸೆಪ್ಟೆಂಬರ್ 12, 2021

ನೀ ಮರೆಯಾದರೂ...



 ನಿನ್ನೊಲವಿನ ತುತ್ತುಗಳ ಉಣಿಸಿ

ನೀ ಮರೆಯಾದರೂ...

ನಾನು ಅವುಗಳ  ಎಣಿಸಿ,

ನೆನಪಿನ ಮುತ್ತುಗಳೊಡನೆ ಪೋಣಿಸಿ,

ನನ್ನ ಮನದಲ್ಲಿ ಭದ್ರವಾಗಿ ಇರಿಸಿರುವೆ!

ಶುಕ್ರವಾರ, ಸೆಪ್ಟೆಂಬರ್ 04, 2020

ರವಿ-ಚುಕ್ಕಿ-ಚಂದ್ರಮ

 


ಪೂರ್ಣ ಚಂದಿರನು ಚುಕ್ಕಿಗಳಿಗೆ ಹೇಳಿದ, ಆಗಸದಿ ನಾನಿರಲು ನೀವು ಹೊಳೆಯುವ ಮಾತೆಲ್ಲಿ...

ಚುಕ್ಕಿಗಳು ಹೇಳಿದವು, ನೀ ತಿಂಗಳಿಗೊಮ್ಮೆ ಹೊಳೆಯುವೆ, ತಿಂಗಳ ಪೂರ್ತಿ ಆಗಸವ ಸಿಂಗರಿಸುವೆವು ನಾವಿಲ್ಲಿ...

ಇವರಿಬ್ಬರ ಮಾತು ಕೇಳಿದ ರವಿಯು ತುಸು ನಕ್ಕು, ಸಿದ್ಧಗೊಂಡಿರುವನು ಉದಯಿಸಲು ಮೂಡಣದಲ್ಲಿ!!!


ಶುಕ್ರವಾರ, ಆಗಸ್ಟ್ 21, 2020

ಶ್ರೀ ಗೌರಿ-ಗಣೇಶ ಹಬ್ಬ ೨೦೨೦

 


ಎಲ್ಲೆಲ್ಲೂ ವಿಘ್ನಗಳೆ, ಪ್ರಪಂಚಕೆ ಲಗ್ಗೆ ಇಟ್ಟಾಗಿನಿಂದ ಕೊರೋನ
ಭಯ-ಭೀತಿಗಳೇ ಮೂಡಿರಲು ಆಗಿವೆ ಸುಖ ನೆಮ್ಮದಿಗಳ ನಿರ್ಗಮನ
ಜಗದ ಪರಿಸ್ಥಿತಿಯ ಸುಧಾರಿಸಲು ಬೇಕಿದೆ ಗಣಪತಿಯ ಆಗಮನ
ಮತ್ತೆ ಶಾಂತಿಯ ನೆಲೆಸಿ ನಮ್ಮನು ಹರಸು ಗೌರಿ ಸುತ ಗಜಾನನ

ಶ್ರೀ ಗೌರಿ-ಗಣೇಶ ಹಬ್ಬದ ಹಾರ್ದಿಕ ಶುಭಾಶಯಗಳು

ಶನಿವಾರ, ಆಗಸ್ಟ್ 15, 2020

ಸ್ವಾತಂತ್ರ್ಯ ದಿನಾಚರಣೆ ೨೦೨೦

 


ಬಲಿದಾನಗಳ ಬುನಾದಿಯಲಿ, ಭಾವೈಕ್ಯತೆಯ ಕಂಬವ ನೆಟ್ಟು, ಅಭಿವೃಧ್ದಿಯ ಪತಾಕೆಯ ಹಾರಿಸುವ ಬನ್ನಿ||

ರಾಗ-ದ್ವೇಷಗಳ ಮರೆತು, ಜಾತಿ-ಭೇದಗಳ ಬಿಟ್ಟು ಒಟ್ಟಾಗಿ ಕಲೆತು, ಎಲ್ಲರೂ ಶಾಂತಿ ಮಂತ್ರವ ತನ್ನಿ||

ವೇಷ-ಭಾಷೆ, ಧರ್ಮ-ಕರ್ಮ ಬೇರೆಯಾದರೂ ಹೆಮ್ಮೆಯಿಂದ  ನಾವೆಲ್ಲರು ಭಾರತೀಯರು ಎನ್ನಿ||


ಎಲ್ಲರಿಗೂ ಸ್ವಾತಂತ್ರ್ಯ ದಿನಾಚರಣೆಯ ಶುಭಾಶಯಗಳು

ಗುರುವಾರ, ಮೇ 28, 2020

ನನ್ನ ಪ್ರಶ್ನೆ - ನಿನ್ನ ಉತ್ತರ



ನನ್ನ ಪ್ರಶ್ನೆಗೆ ನಿನ್ನ ಪ್ರತಿಕ್ರಿಯೆಯ ನೋಡಲು ಹೆಚ್ಚಿದೆ ಕಾತರ
ಮನದೊಳು ಮೂಡಿದೆ ನೀನಂದು ನೀಡಿದ ಭಾಷೆಯ ಬಿತ್ತರ
ಕಿವಿಯೊಳಗೆ ಪಿಸುಗುಡಬಾರದೆ ಬಂದೊಮ್ಮೆ ನನ್ನ ಹತ್ತಿರ
ಅದಾಗದಿದ್ದರೂ ಮೌನದಿ ಕಣ್ಸನ್ನೆಯಲಿ ನೀಡು ನಿನ್ನ ಉತ್ತರ