ಉತ್ತರ

ತಣ್ಣೀರ ಎರಚಿ ಆಸೆಗಳಿಗೆ
ದೂರ ಹೋದೆ ಬರಲಾರದೆ ನನ್ನ ಹತ್ತಿರ

ನಿನ್ನ ಅಗಲಿಕೆಯ ಪ್ರಶ್ನೆಗಳಿಗೆ
ಈಗ ನನ್ನದು ಬರಿಯ ಕಣ್ಣೀರಿನ ಉತ್ತರ.

ಕನ್ನಡದ ಕಂಪು

ಮೂಡಣದಿ ಹಳದಿಯ ಚಿತ್ತಾರ, ಪಡುವಣದಿ ಕೆಂಪಿನ ಚಿತ್ತಾರ
ಇದ ಪ್ರಕೃತಿಯೇ ಬಿಡಿಸಿರುವಳು ತನ್ನ ಕೈಯ್ಯಾರ||
ಪಸರಿಸುವ ಕನ್ನಡದ ಕಂಪನು ಅವಳ ಅನುಸಾರ
ಆಚರಿಸುವ ಕನ್ನಡಮ್ಮನ ಹಬ್ಬವ ತುಂಬು ಮನಸಾರ||

ಎಲ್ಲರಿಗೂ ಕನ್ನಡ ರಾಜ್ಯೋತ್ಸವದ ಹಾರ್ದಿಕ ಶುಭಾಶಯಗಳು

ಬಾಳೆಂದರೆ?

ಬಾಳೆಂದರೆ...
ಕಾಣದ ಕೈಗಳ ಬರವಣಿಗೆಯೊ?
ನಮ್ಮ ವಿಧಿಯ ಮೆರವಣಿಗೆಯೊ?

ಇನ್ನೂ ಹುಡುಕುತಲಿರುವೆ ಉತ್ತರ,
ಚಾಚಿದೆ ಕುತೂಹಲ ಬಾನೆತ್ತರ

ಬಂಡಿ

ಮೂಡುವ ಹೊಸ ಕನಸುಗಳ
ಕಾಡುವ ಹಳೇ ನೆನಪುಗಳ
ಹಳಿಗಳ ಮೇಲೆ ಸಾಗಿದೆ ಜೀವನದ ಬಂಡಿ

ಕರುಣೆ ಬೇಡುವ ಕರಗಳ
ಪ್ರೀತಿ ನೀಡುವ ಮನಗಳ
ಬೆಸೆದಿಹುದು ಬಾಳಿನ ಕೊಂಡಿ!

ಎಲ್ಲೆಲ್ಲೂ ಗಣಪ

ನೆಲೆಸಿರುವನು ನಮ್ಮಲ್ಲೇ ದೇವ ಗಜಾನನ
ಹರಸುತ ನಮ್ಮನ್ನು ಪ್ರತಿ ಕ್ಷಣ ಪ್ರತಿ ದಿನ

ಅಮ್ಮಂದಿರಿಗೆ ಪ್ರೀತಿಯ ಬಾಲಚಂದಿರ
ಕಂದಮ್ಮಗಳಿಗೆ ಮುದ್ದಿನ ಲಂಬೋಧರ

ವಿದ್ಯಾರ್ಥಿಗಳಿಗೆ ವಿದ್ಯೆ ನೀಡುವ ವಿದ್ಯಾಗಣಪತಿ
ವಿಘ್ನ್ಯಗಳ ಅಳಿಸಿ ಹರಸುವ ಮಹಾಗಣಪತಿ

ಎಲ್ಲರಿಗೂ ಸುಬುದ್ಧಿ ನೀಡುವ ಬುದ್ಧಿವಿಧಾತ
ತನ್ನ ಭಕ್ತರಿಗೆ ಸದಾ ಸಿದ್ಧಿಸುವ ಸಿದ್ಧಿದಾತ

ನೆಲೆಸಿರುವನು ನಮ್ಮಲ್ಲೇ ದೇವ ಮೂಷಿಕವಾಹನ
ಈ ಹಬ್ಬದಲ್ಲಿ ಪರಿಶುದ್ದವಾಗಲಿ ನಮ್ಮ ತನು-ಮನ

ಎಲ್ಲರಿಗೂ ಗೌರಿ-ಗಣೇಶ ಹಬ್ಬದ ಹಾರ್ದಿಕ ಶುಭಾಶಯಗಳು :)

ಹೇಗೆ???

ಹೇಗೆ ನುಡಿಯಲಿ ನೀನಿರದ ಪದಗಳನು
ಹೇಗೆ ಕಳಿಯಲಿ ನೀನಿರದ ಕ್ಷಣಗಳನು,
ಹೇಗೆ ಮರೆಯಲಿ ನಿನ್ನ ನೆನಪುಗಳನು,
ಹೇಗೆ ಅಳಿಸಲಿ ಅವು ಕೊಟ್ಟ ಕಣ್ಣೀರ ಹನಿಗಳನು!!!

ಧಾವಂತ

ಪ್ರತಿ ಕ್ಷಣವೂ ನಿನ್ನ ನೋಡಲು ನನ್ನಲಿ ಧಾವಂತ
ನಿನ್ನ ಕಾಣದೆ ಸತ್ತಂತೆ, ಇದ್ದರೂ ನಾ ಜೀವಂತ!!!

ಏಕೆ???

ಅದೆಲ್ಲೋ ಏಕೆ ಹುಡುಕಲಿ,
ನಿನ್ನದೆ ನೋಟವಿರಲು ನನ್ನ ಕಣ್ಣಲಿ
ನಿನ್ನನು ಏಕೆ ನಾ ನೆನೆಯಲಿ,
ಉಸಿರಾಗಿರುವಾಗ ನೀ ನನ್ನಲಿ||

ಮಿತಭಾಷಿ

ನನ್ನಿಂದ ಹೊರಡದ ಮಾತುಗಳು,
ನಿನ್ನ ಕಂಡಾಗಿನಿಂದ ನಾನಾಗಿರುವೆ ಮಿತಭಾಷಿ
ಮಿಟುಕದ ಕಣ್ಣ ರೆಪ್ಪೆಗಳು,
ಒಂದು ಕ್ಷಣ ನಿಂತ ಎದೆ ಬಡಿತವೆ ಅದಕೆ ಸಾಕ್ಷಿ!!!

ಅಂಗಿ ಗುಂಡಿ!!!

ರಂಗು ರಂಗಿನ ಅಂಗಿಯಂತೆ ಒಲವಿದು, ತೊಡಲು ಬೇಕಿದೆ ಕನಸಿನ ಗುಂಡಿಗಳು.
ಸುಂದರ ಮಾಲೆಯಂತೆ ಬದುಕಿದು, ಅದ ಬೆಸೆದಿವೆ ನೋವು ನಲಿವಿನ ಕೊಂಡಿಗಳು.

ಹೋಕುಳಿ

ಸುಂದರ, ಪ್ರೀತಿಯ ಬಳುವಳಿ
ಎಲ್ಲರಿಗು ಹಂಚಿ ನಿಮ್ಮಲ್ಲಿ ಹೆಚ್ಚಿಸಿಕೊಳ್ಳಿ.

ಪ್ರೀತಿಯಂತೆ ಬಣ್ಣದ ಹೋಕುಳಿ
ಎಲ್ಲರಿಗು ಹಚ್ಚಿ ನೀವೂ ಹಚ್ಚಿಸಿಕೊಳ್ಳಿ!!!

ನೀನೆಂದರೆ...

ನೀನೆಂದರೆ...

ಶುಭ್ರ ವಿಶಾಲ ಬಾನಿನಂತೆ
ಜೀವ ಉಳಿಸುವ ನೀರಿನಂತೆ
ತಂಪನು ತರವು ಗಾಳಿಯಂತೆ
ಕತ್ತಲ ಕರಗಿಸುವ ಬೆಂಕಿಯಂತೆ
ತಾಳ್ಮೆ ತೋರುವ ಭೂಮಿಯಂತೆ.

ಆಗಿರಲು ನೀ ಸುಂದರ ಪ್ರಕೃತಿಯಂತೆ
ಕಾಡದು ನೀ ನನ್ನೊಡನೆ ಇರದ ಚಿಂತೆ||

ಹೊಸ ತಿರುವು

ನಿಂತಿರುವೆ ಬಾಳಿನ ಹೊಸ ತಿರುವಿನಲ್ಲಿ
ಮುಂದೇನೆಂಬುದರ ಕಾಣದ ಸುಳಿವಿನಲ್ಲಿ.

ಮುಂದಿರುವುದು ಕನಸುಗಳ ಮಾರುವ ಬೀದಿಯೋ? ಇಲ್ಲಾ
ಅಂಕು ಡೊಂಕಿನ ಬಿದ್ದೇಳುವ ಹಾದಿಯೋ? ನಾ ತಿಳಿದಿಲ್ಲ!!!

ಕನಸುಗಳ ಬೀದಿಯಾದರೆ, ಅವುಗಳ ಕೊಂಡು ನನಸಾಗಿಸುವೆ
ಬೇರೆ ಹಾದಿಯಾದರೆ, ಬದುಕನು ಅದು ಹೇಗೋ ಸಾಗಿಸುವೆ.

ಆದರೂ
ನಿಂತಿರುವೆ ಬಾಳಿನ ಹೊಸ ತಿರುವಿನಲ್ಲಿ
ಮುಂದೆ ಸಾಗಲು ನಾಳೆಗಳ ಇರುವಿನಲ್ಲಿ.