ಜಿ.ಎಸ್.ಎಸ್

ತೀರದ ಮನದ ಭಾವಕೆ,
ಅರ್ಪಿಸಿದರು ತಮ್ಮ ತನು ಮನ.
ತೀರಿದ ಕವಿ ಜೀವಕೆ,
ಎರಡು ಸಾಲಿನ ಪುಟ್ಟ ಪದ ನಮನ.

ಬೈರಾಗಿ

ಅಂದುಕೊಂಡಿದ್ದೆಲ್ಲಾ ನಡೆದು ನೀ ಗೆದ್ದರೆ ನಿನ್ನ ಹಿಂದೆ ಜಗದ ಬಲವಿದೆ
ಅಂದುಕೊಂಡಿದ್ದು ನಡೆಯದೆ ಸೋಲುಂಡರೆ ನಿನ್ನೆದುರಿಗೆ ಕಷ್ಟದ ಬದುಕಿದೆ||

ಕ್ರೂರ ಜಗವಿದು, ಗೆಲುವಿನಲ್ಲಿ ನೀ ಮೆರೆವಾಗ ಎಲ್ಲವೂ ನಿನ್ನದೆ, ನೀ ಭೋಗಿ
ಸೋತು ಬರಿಗೈಲಿ ಇರುವಾಗ, ತಪ್ಪೆಲ್ಲವೂ ನಿನ್ನದೆ, ನೀ ಒಂಟಿ ಬೈರಾಗಿ!!!

ತೇರು

ನಿನ್ನೊಡನೆ ಕಳೆದ ಸವಿಕ್ಷಣಗಳ ಬೇರಿಗೆ,
ಮೂಡಿಹುದು ನೆನಪಿನ ಚಿಗುರು||

ಹೊರಟಿರುವ ನಿನ್ನ ಪ್ರೀತಿ ತೇರಿಗೆ,
ಸಿಂಗಾರಗೊಂಡಿದೆ ನನ್ನೆದೆಯ ಊರು||

ವಾಸ್ತವ

ಕಣ್ಣು ಮಿಟುಕಿಸದೆ ಅದೆಲ್ಲೋ ಕಳೆದು ಹೋಗಿರುವಾಗ ನಿನ್ನ ಸಿಹಿ ನಗುವಿನದ್ದೇ ಕಲರವ
ಕಣ್ಣು ಮುಚ್ಚಿ ಮನದ ಆಳದಿ ಮುಳುಗಿರುವಾಗ ನಿನ್ನ ನೆನಪುಗಳೇ ಆ ಕ್ಷಣಕ್ಕೆ ವಾಸ್ತವ!!!

ಕನ್ನಡಾಂಬೆ

ಕನ್ನಡ ಮಾತೆಯ ಮಡಿಲು ಪ್ರಕೃತಿ ಸೌಂದರ್ಯದ ಕಡಲು,
ಕನ್ನಡಾಂಬೆಯ ಒಡಲು ಕರುಣೆ ಮಮತೆಯ ಮುಗಿಲು!!!

ಕನ್ನಡ ರಾಜ್ಯೋತ್ಸವದ ಹಾರ್ದಿಕ ಶುಭಾಶಯಗಳು :)

ದುಂಬಾಲು!!!

ನಾವಿಬ್ಬರು ಸೇರಿದ ಕ್ಷಣಗಳು ಗತಿಸಿರಬಹುದು,
ನಿನ್ನ ಸೇರುವ ಆಸೆ ಮತ್ತೆ ಮತ್ತೆ ಹುಟ್ಟಿಹುದು ನನ್ನಲ್ಲಿ.

ದುಂಬಾಲು ಬಿದ್ದಿರುವೆ ಎಂದು ನಿನಗನಿಸಬಹುದು,
ಆದರೆ ಅದ ಬಿಡೆನು ಪ್ರೀತಿ ಮೂಡುವವರೆಗು ನಿನ್ನಲ್ಲಿ!!!

ಒಗ್ಗರಣೆ

ಅಡುಗೆಯ ಒಗ್ಗರಣೆಯಿಂದ ರುಚಿಯು ಭೋಜನ,
ಸುಖ-ದುಃಖಗಳ ಒಗ್ಗರಣೆಯಿಂದ ಸವಿಯು ಜೀವನ||

ಜೀವನದಿ!!!

ನಿಜ, ಸಾವನ್ನು ಯಾರೂ ಗೆಲ್ಲಲಾಗದು
ಅದುವೆ ಎಲ್ಲರು ಪಯಣಿಸುವ ಕೊನೆ ಹಾದಿ||

ಆದರೆ, ಅದರ ಭಾವನೆಗಳ ಮೆಟ್ಟಿ ನಿಲ್ಲಬಹುದು,
ಆಗ ಹರಿಯುವುದು ಎಲ್ಲರಲ್ಲೂ ಚೈತನ್ಯದ ಜೀವನದಿ||

ಹುಣ್ಣಿಮೆಯ ತವಕ

ಭೂತಾಯಿಗೆ ಇಂದು ಆಗಸದ ಚಂದಿರನಿಂದ ಹಾಲ ಬೆಳಕಿನ ಅಭಿಷೇಕ,
ಎಲ್ಲೆಲ್ಲೂ ಹರ್ಷದ ಹೊನಲು, ಜಡ ಕತ್ತಲ ತೊಳೆದ ಆ ಬೆಳಕಿನ ಜಳಕ,
ಮೂಡಿಹುದು ನನ್ನಲ್ಲಿ, ತಂಗಾಳಿ ತೂಗುವ ಜೋಗುಳದಿ ನಿದ್ರಿಸುವ ಪುಳಕ,
ಸವಿನೆನಪುಗಳ ಹೊದ್ದ ಮನದೊಳು ಅದಾಗಲೆ ಮುಂದಿನ ಹುಣ್ಣಿಮೆಯ ತವಕ!

ಅಮೂಲ್ಯ ಸ್ನೇಹ

ಅಮೂಲ್ಯ ನಮ್ಮ ಸ್ನೇಹ, ಕೊಳ್ಳಲಾಗದು ಇದ ಕೋಟಿ ಹಣವು,
ತುಂಬಿರಲಿ ಹೀಗೆ ನಮ್ಮೀ ಸ್ನೇಹದಲ್ಲಿ ನಿಸ್ವಾರ್ಥದ ಗುಣವು.
ಇನ್ನೆಷ್ಟು ಜನ್ಮಗಳು ಬೇಕೊ ತೀರಲು ನಿಮ್ಮ ಸ್ನೇಹದ ಋಣವು,
ನಿಮ್ಮ ವಿಶ್ವಾಸವ ಸದಾ ಉಳಿಸಿಕೊಳ್ಳುವುದೇ ಜೀವನದ ಪಣವು.

ಎಲ್ಲಾ ಸ್ನೇಹಿತರಿಗೆ, ಸ್ನೇಹಿತರ ದಿನದ ಹಾರ್ದಿಕ ಶುಭಾಶಯಗಳು :)

ಗುಳಿ

ಆ ನಿನ್ನ ಕೆನ್ನೆ ಗುಳಿಯ ಸುಳಿಯಲ್ಲಿ ನಾನಿರುವುದು ನಿನಗೆ ತೋರದೆ?
ನೀ ನಗುವ ಚೆಲ್ಲಿದ ಕ್ಷಣದಿಂದ, ನಾನಲ್ಲಿ ಸಿಲುಕಿರುವೆ ಹೊರ ಬಾರದೆ.
ಅದರಲ್ಲೇ ಜೀವಿಸುವ ಬಯಕೆ, ಆ ನಗುವ ತೋರು ಹೆಚ್ಚು ಕಾಡದೆ
ಇನ್ನಷ್ಟು ಮುಗುಳ್ನಗುವ ಸೂಸಿ ನನ್ನ ಕೂಡಿಹಾಕು ಬಿಡುಗಡೆಯ ನೀಡದೆ!!!

ಮನದ ಕಿಟಕಿ

ನಿನ್ನ ಸನಿಹದಿ ಕಂಡ ಪ್ರೀತಿಯ ಭಾವವು
ಮೂಡಿಸಿಹುದು ನನ್ನಲ್ಲಿ ಹೊಸ ಚೈತನ್ಯದ ಅಲೆ.

ನಿನ್ನ ಅಗಲಿಕೆಯು ತಂದ ಕಣ್ಣೀರ ಹನಿಯು
ಜಾರುತಿಹುದು ನನ್ನ ಮನದ ಕಿಟಕಿಯ ಮೇಲೆ!!!

ಅಗಲಿಕೆಯೊ? ಸನಿಹವೋ? ನಿನಗೆ ಬಿಟ್ಟ ವಿಷಯವು,
ಏನೇ ಆದರೂ ನನ್ನಲ್ಲಿ ಸುಳಿಯದು ನಿನ್ನ ಮರೆಯುವ ಕಲೆ!

ಗುಂಡಿ-ಕೊಂಡಿ!

ನೆನ್ನೆ ಸುರಿದ ಭಾರಿ ವರ್ಷಕೆ ನಮ್ಮೂರಿನ ರಸ್ತೆಗಳಲ್ಲೆಲ್ಲಾ ಕೆಸರು ತುಂಬಿದ ಗುಂಡಿಗಳು,
ಇಂದು ಸಿಕ್ಕ ಹಣದ ಸ್ಪರ್ಶಕೆ, ಮನುಜನಲ್ಲಿ ಕಳಚಿಕೊಂಡವು ಸಂಬಂಧಗಳ ಕೊಂಡಿಗಳು!

ಕೆಸರು ತುಂಬಿದ ಗುಂಡಿಗಳಿಂದ ಕೆಟ್ಟರೆ ಬಂಡಿ, ಕಳಚಿಕೊಂಡ ಸಂಬಂಧಗಳಿಂದ ಸಾಗದು ಜೀವನದ ಬಂಡಿ!

ಇಳೆಯಾಗಿ

ಇದ್ದೆ ನಾನಿಲ್ಲೇ ಅದೆಲ್ಲೋ ಕಳೆದುಹೋದ ಪದಗಳ ಹುಡುಕುತ್ತ,
ಮಧುರ ಭಾವಗಳು ಕಳಚಿ, ಮನವು ಆಗಿತ್ತು ಜಡಭಾವದ ಹುತ್ತ||

ಕಾತುರದಿ ಕಾಯುತಲಿದ್ದೆ ಹೊಸಚೈತನ್ಯವು ಸುರಿಸುವ ಪದಗಳ ಇಂಪು ಮಳೆಗಾಗಿ,
ಕೊನೆಗೂ ಬಂದ ಆ ವರ್ಷಕೆ, ಕಂಗೊಳಿಸಿಹುದು ಮನ, ಪದಗಳೇ ತುಂಬಿರುವ ಇಳೆಯಾಗಿ!

ಸೋಲು - ಗೆಲುವು

ಸಿಹಿಯು ರುಚಿಸಲು ನಾಲಿಗೆಯು ಕಹಿಯ ಸವಿದಿರಬೇಕು
ಸುಖದ ಅರಿವಾಗಲು ಜೀವನದ ಕಷ್ಟಗಳ ತಿಳಿದಿರಬೇಕು
ಬೆಳಕನು ಅರ್ಥೈಸಲು ಕತ್ತಲ ರಾತ್ರಿಯು ಕಳೆದಿರಬೇಕು
ಗೆಲುವನು ಸಂಭ್ರಮಿಸಲು ಸೋಲು ಹತ್ತಿರ ಸುಳಿದಿರಬೇಕು.

ಈಗಿನ ಸೋಲು ಆಗಲಿ ಮುಂದಿನ ಗೆಲುವಿಗೆ ಅಡಿಪಾಯ,
ಕುಗ್ಗದೆ ಮುನ್ನುಗ್ಗು, ಅರ್ಥಪೂರ್ಣ ಆಗ ದಕ್ಕುವ ಜಯ.

ಸೂತ್ರ

ಸಾವೆಂಬುದು ನಮಗೆ ನಿರೀಕ್ಷಿತ
ಸಾಯುವ ಬಗೆ ನೆಪ ಮಾತ್ರ.

ಬಾಳಿನ ಪ್ರತಿ ಘಳಿಗೆ ಅನಿರೀಕ್ಷಿತ
ಅದಕೆ ತಾಳ್ಮೆಯೇ ನಿಜ ಸೂತ್ರ!!!

ಹೊಸತು

ಹೊಸ ವರ್ಷದ ಹೊಸ ಕವನವಿದು

ಪದಗಳು ಹಳೆಯವು, ಆದರೆ ಹೊಸತು ಈ ಭಾವ
ಅದೇ ಜಡ ದೇಹ, ಒಳಗೆ ಚೈತನ್ಯ ತುಂಬಿದ ಜೀವ.

ಕಾಡುವ ನೆನಪುಗಳು, ಆದರೂ ಬರವಣಿಗೆಯ ನೆನೆದು ಪುಳಕ
ತೀಡುವ ಯೋಚನೆಗಳು, ಆದರೂ ನಿಲ್ಲದ ಬರೆಯುವ ತವಕ.